U3F1ZWV6ZTExMjYwODI0NDI2NDcyX0ZyZWU3MTA0MzAxNzgxMjE1

بنت أصول .. الحزء الاول

مش عارفة كان قرار صح والا غلط لما قررت اتجوز واحد مش من الطبقة الاجتماعية اللى بنتمى لها .

يمكن طموحه وذكائه وخجله وأدبه جذبونى ليه وخلونى أتجاوز عن حتة الفروق الاجتماعية دى.

انا بفكر فى كل ده وانا سايبة بيتى انا وبنتى , بعد ما قررت الانفصال لكن انا حتى مش عارفة اروح فين واعمل ايه؟

لكن اللى اعرفه كويس انى لازم اطلق من اكتر انسان حبيته فى الدنيا بعد 4 سنين جواز بعد ما اكتشفت ان فعلا البيئة تؤثر على الشخص وتحول اللى حبيتيه شخص عمرك ما عرفتيه.

قصص وحكايات


انا شجن الملاوى بنت محمود الملاوى بنت الاصول الرفيعة 

يمكن من 7 سنين بس ابويا كان يتحسب على طبقة الأغنياء لكن مفيش حاجة بتفضل على حالها

حصلت له مشاكل فى شغله أثرت عليه لكن ما زلنا ساكنين فى التجمع لان الفيلا بتاعتنا تمليك وما زلت بركب عربيتى هى مش غالية اوى لكن كويسة فى الواقع هى عربية واحدة لينا كلنا انا وبابا وماما.

الناس بيبصو لينا بنظرة احترام كبيرة رغم وضعنا المالي اللى مبقاش زى الاول لكن يمكن علشان مش كله يعرف وضعنا بقى عامل ازاى.

أما هو (ماهر ) زميلى فى الجامعة صحيح مش نفس الكلية هو كان كلية تجارة وأنا كلية تربية

لكن يجمعنى بيه حاجة تانية خالص الشغل.

انا اضطريت اشتغل فى شركة بتوصية من والدي عند احد معارف العائلة فكنت فى وظيفة كويسة بجانب الدراسة ومرتبها نوعا ما كان كويس اهو بيكفيني مصاريف بالعافية .

أما هو فكان تحت التدريب فى الشركة دى كمحاسب كنت ديما بسمع اطراء من المديرين بتوعه عليه وعلى ذكائه وسرعة استيعابه.

لفت نظرى وكنت حابة اتعرف عليه لكن بصراحة انا ما بادرتش بأى مبادرة .

لحد ما فى يوم وانا فى الشركة لقيت على مكتبى بوكيه ورد صغير شوفت الكارت اللى فيه لاقيت مكتوب

كل سنة وانتى طيبة النهاردة عيد ميلادك .

مفيش امضاء !!

ضحكت اوى لان النهاردة مش عيد ميلادى ولو انه التاريخ المكتوب فى شهادة الميلاد لكن انا ما اتولدتش زي النهاردة

انا مولودة قبل كده ب 10 ايام كاملين لكن شهادة الميلاد اتعملت بعد ولادتى ب 10 ايام لمشاكل كانت موجودة ايامها

اللى حط البوكيه ده حد من الشركة ما يعرفش عنى غير الموجود فى شئون العاملين.!

حاجة جوايا قالت لى انه هو ماهر لكن حبيت اتأكد طلبت من الاوفيس بوى ياخد الورد يرميه وبدأت امثل انى متعصبة لان النهاردة مش عيد ميلادى فى اللحظة دى ماهر كان قريب من مكتبى وكان سامع كلامى وانا بتكلم ان حتى لما حد اهتم بيا كان غلط .

بص لى وهو مكسوف جدا وبعدين اختفى لاخر اليوم.

يا ترى لو هو يبقى انا كده احبطته وقضيت على امه فى انه يتعرف عليا والا اديته دفعه يتحرك فى حركة واضحة اكتر ؟

فى الواقع كان خجول جدا وانا فى اللحظة دى اتأكدت انه فعلا هو لأن و انا خارجة من الشركة ورايحة ناحية عربيتى لقيته واقف جنب العربية وواقف محرج ومكسوف .!!

فى الواقع تجاهلت فضولى فى انى اعرف ايه ورا ضهره ورميت عليه السلام ببرود

لقيته بيطلع من ورا ضهره وردة بيضا جميلة وبيعتذر انه كان فاكر ان عيد ميلادى النهاردة زى ما عرف من تاريخ ميلادى فى شئون العاملين وما يعرفش انه فى يوم تانى.

وانه خايف يدينى الهدية احسن اكون بتضايق من الاحتفال بعد عيد الميلاد زى الطليان مثلا ..

ابتسمت له وفهمته اني ما كنتش اعرف انه هو اللى عمل كده واعتذرت لو اسلوبى ضايقه .

لكن فوجئت انه بيقولى مش قابل الاعتذار وبعد ما ظهرت علامات الدهشة على وشى بوضوح.  
بالذات لما كمان شوفت علامات الثقة عليه أسرع في انه يقول انه مش هيقبل الاعتذار الا لو عزمته على فنجان قهوة عند كافيه كان قريب من مقر الشركة

ضحكت ووافقت .

قعدنا على الكافية لقيته بيحط علبة وبيقولى ان دى هدية عيد ميلادى بعد اعتذارات كثيرة جدا انها جت متأخر طلب منى ما افتحها الا لما اروح اكون وحدى.

من هنا وتوالت المقابلات بينا لحد ما اعترفلى بحبه ليا فى الواقع انا كمان كنت اتعلقت بيه اوى.    
وقبل ما اشرح له وضعنا المادي انا واهلى لقيته هو بيتكلم عن نفسه وعن أهله.

ماهر أهله فلاحين من الدقهلية كلهم عايشين فى بيت واحد صحيح كل واحد له شقة لكن عايشين فى بيت عيلة مع بعض تحت ادارة اخوه الكبير جابر له 5 اخوات غيره .

هو الأصغر فيهم كلهم وهو الوحيد اللى اتعلم تعليم عالى علشان كده هو حاجة كبيرة اوى عندهم وبيصرفو عليه كويس اوى علشان يقدرو يفتخروا بيه فى البلد.

حكالى عن والدته وعن اخته ومراتات اخواته والاطفال الصغيرين اللى زى النمل فى البيت.

كان بيحكى وأنا سرحت تماما .

انا مستحيل اعيش العيشة دى انا كنت قلقانة انى اقوله اننا رغم البيت اللى فى التجمع والعربية اللى بناخدها بالتبادل انا وماما وبابا الا اننا خلاص مفيش اى أملاك غير دول بس.

الاقيه يقولى فلاحين وبيت عيلة اه بحبه بس مش هاقدر اعيش العيشة دى سيبته كمل باقى كلامه وبعدين استأذنت علشان أرجع البيت .

ما روحتش الشغل اسبوع كامل , وقفلت تليفونى . لكن كانت المفاجأة الحقيقية!!

لما لقيت ماهر فى البيت عندنا ولقيت ماما بتنادينى وتقولى ان زميل ليا فى الشغل جه يسأل عنى علشان غيابى

كان هو كان ماهر القلق كان باين عليه جدا لكن رغم قلقه الا ان شكله كان مبهر كان لابس بدلة انيقة جدا وحاطط برفيوم يجنن عامل تسريحة شعر فى منتهى الاناقة والرقي .

اول ما خرجت ماهر وقف يبص فى وشى ملامحه كانت بتسأل مالك فيكى ايه؟؟

لحظات صمت عدت علينا لكن كنا بنتكلم بالعيون.

عيون ماهر كانت بتقولى بعدت ليه ؟ لكن عيونى انا كانت بتهرب منه ومن الاجابة !

مينفعش اقوله انا بعدت علشان لقيتك مش قد المقام ما ينفعش اجرحه او احرجه وكمان ما ينفعش اكمل فى حياة محكوم عليها بالفشل.

ولان ماما كانت قاعدة ما عرفناش غير اننا نتكلم بشكل رسمي جدا .

ماما كانت قاعدة باين عليها انها معجبة بماهر شياكته وريحته الحلوة و اناقته فى الكلام ماهر رغم أصله الريفي إلا أنه يراعى الايتيكيت جدا .

طمنته انى كويسة كان عندى بس شوية برد وبقيت احسن شال بوكيه ورد كان على الترابيزة واداهولى بعد ما اخد منه وردة واداها لماما فى ايدها كانت حركة شيك اوى منه !

قعد لدقائق وبعدها استأذن علشان يمشى خرجت معاه لحد بره وهناك بدأ يكلمنى

ماهر : انتى بعدتى ليه يا شجن؟.

شجن: انا بس بحاول ما اخدش قرارات سريعة.

ماهر: ما تكدبيش عليا يا شجن انتى خوفتى من اصولى الريفية وانى أأثر على طريقة حياتك بسبب كده بس ده مش هيحصل.

شجن بانفعال : مش هيحصل ازاى يعنى انت فاكرني مش عارفة سيستم الحياة في الأرياف و...

يقاطعها ماهر: واحنا مالنا بالارياف ؟ هما اهلى وبحترمهم جدا وهما سبب وجودى وعزى.
لكن انا ليا حياة خاصة بعيدة عنهم يا شجن ليا شقة هنا فى مصر الجديدة , دى بتاعتى وبمجرد التخرج هابدأ مشروع خاص بيا.
لان اخويا جابر قالى انه ممكن يشترى نصيبى فى ارض ابويا و يدينى فلوس بعد التخرج ابدا بيها حياتى . 
 لو ده اللى بعدك ارجوكى ما تبعديش.

ما انكرش ان كلامه ريحني جدا لو كده ماشى وانا بقدر اتعامل مع الناس من مختلف الطبقات لكن العيش معاهم موضوع تانى .

استمرينا مع بعض لشهور نروح الجامعة سوا ونروح الشغل سوا ماما كانت عارفة بعلاقتنا كانت فرحانة بماهر وبتحبه

اما بابا فكان مشغول بيزنس جديد عاوز يعمله فى هولندا بيقول انه هيعوضه كل خساراته بالذات انه كان ليه قبل كده بيزنيس هناك وهو محل ثقة عند البنوك والمستثمرين هناك.

السنة الدراسية خلصت وماهر اتخرج انا كان لسه فاضلى سنة كمان

بمجرد ما ماهر اتأكد من نجاحه وكنت ببارك له لقيت ماما بتكلمنى يومها بالليل فاجئتنى!.

ماهر كلمها وطلب منها يحدد له ميعاد مع بابا عشان يجى يتقدملى للجواز!!.

رغم انى كنت مبسوطة جدا بكده إلا انى وبعد شوية تفكير خوفت جدا!.

بابا شخص عنصري جدا أجداده بشوات اتراك عثمانيين جده اصلا امير من امراء الباب العالى فى اسطنبول بابا نظرته للفلاحين متدنية جدا

مش متخيلة بابا اللى رفض يشارك احدهم وكان ينتشله من أزمته المالية دى لمجرد انه فلاح جلنف ممكن يناسب واحد من أبناء هؤلاء الفلاحين

على العموم بابا جاى بكرة من هولندا وماما هتفتح معاه الموضوع ادعولى يوافق يقابله...

بقلم / إيمان عزمي
تعليقات
ليست هناك تعليقات
إرسال تعليق

إرسال تعليق

الاسمبريد إلكترونيرسالة